عيد سعيد علي كل المسلمين يا رب ..... كل سنه وانتم طيبين
***
حاجه اتعلمتها من الجيش .. احنا بنضيع وقت كتييير قوي كل يوم من غير حاجه مفيده , اتمني الناس تبدأ تقدر قيمه الوقت وتستفيد بيه .. اليوم فيه 24 ساعه منهم 18 ساعه صاحي .. ياتري بتستغل قد ايه منهم ؟
***
النعم لا تعد ولا تحصي.. لكن ما يحصي هو ما تفقده من هذه النعم .. ما تريد ان تتذوقه من جديد بعد ان حرمت منه , فحاول ان تتعلم كيف تشكر المولي علي النعم التي بحوزتك بدلا من البحث فيما فاتك منها
خلاص العد التنازلي بدأ و حروح الجيش يوم 2 نوفمبر بس دي تعتبر اخر بوست قبل الجيش لو لم يجد جديد لاني مشغول خالص الايام دي , اتمني اني اقضي وقت ممتع و جميل في منتجع القوات المسلحه الكائن بفايد .. واكل مانجه و فراوله و تفاح
وكمان كنت اتمني ان يكون معايا دعوه مجانيه لاصحابي لمشاركتي في وقت الاستجمام ده , بس انا واثق انهم متفهمين مدي صعوبه احضار ناس للمكان المتميز ده ,خصوصا ان الواحد لازم يجتهد و يعدي اختبارات كتير جدا صعبه موت , و مش اي حد في الاخر بينجح , لازم يكون اما منحوس خالص او منحوس جدا عشان يعدي كل ده و ينجح
وواضح اني كنت من ده علي ده
----
طبعا ميصحش اختم من غير ما اعلق علي الكليه بتاعتي , اللي انا سيبتها من مده , بس لسه في تجمع دموي في دماغي لازم افرغه هنا الاول .. بس نبتدي منين الحكايه ؟
نبتديها من الاول
كان ياما كان يا سعد يا اكرام , كان في طالب اسمه توني , الطالب ده مجتهد عبقري عارف هو عايز ايه , الطالب ده كان في بعض اللحظات مصدر تعاسه للبعض , خصوصا لما كان يقفل امتحان و يجيب فيه امتياز .. وناس تانيه متحطش فيه قلم , بس دي مش غلطته اكيد , ولا نقدر نلومه عليها .. يعني نلومه انه بيذاكر؟ ؟ وحتي لما كانت ماده تبقي نسبه النجاح فيها اقل من المتوسط .. و يتضاف درجات رفع للطلبه , عمره ما قال كلمه اعتراض ولا علق .. رغم ان في مواد كان بيبقي ظلم ليه ان ناس تانيه تاخد درجات رفع(دي مختلفه عن درجات الرأفه) , بعكس زميل تاني جه في سنه من السنين وجاب درجه نهائيه في ماده .. فقدم شكوي في الكليه يرفض اضافه اي درجات رفع لباقي الطلبه .. ساعتها عرفنا قد ايه انتوني انسان كويس و طيب و متواضع .. وفوق ده كله كريم
توني كان لامع من يومه , في اعدادي طلع الاول علي الكليه , و بنسبه تكاد تبلغ الكمال .. طلع الاول علي كل الدفعه في كل السنين ما عدا تيرم واحد فقط لا غير , طلع التاني
الفرق بينه و بين التاني علي الدفع كبييير لدرجه تخليه الاول حتي لو جه في تيرم محلش وجاب مقبول او ضعيف بس الاول علي الجامعه مش توني تقولولي بقي ليه ؟ هو في حد جاب اكتر منه ؟
لا , لانه جاب مجموع عالي جدا .. جاب حوالي 96% كمجموع تراكمي و ده رقم صعب تحقيقه فضلا عن تحقيقه
طب لما الاول جاب اقل من توني ..ليه مش توني هو الاول ؟ اقولكم بقي , اصل الحكايه ان لائحه الكليه عندنا حاجه كده زي دستور البلد .. كل سنه يجيبوا ترزي يفصلها علي مقاس اللي يعجبوا , والظاهر ان السنه دي محبوش توني .. او حبوا واحد تاني و حبوا يجاملوه الله اعلم
بس اللائحه بقي في حد ذاتها مهزله
بتقول ايه اللائحه ؟ بتقول ان تحديد الاول علي الجامعه مش حيكون زي ما العالم كله بيعمل , مش حيكون المقياس المجموع النهائي
امال ايه ؟
المقياس حيدخل فيه عوامل حيويه تانيه .. زي عدد طلبه القسم , عدد الراسبين بالاضافه للمجموع
الكلام شكله حلو اهو و منمق قوي .. بس تعالوا نتفرج علي النتيجه
لما تدخل عدد الطلبه في المعادله .. معني كده ان اول علوم ملوش اي فرصه في تحقيق اي مركز لو كان المنافس بتاعه من تجاره .. لان لو بتاع تجاره جاب جيد علي 10000 طالب انتساب وا نتظام .. وبتاع علوم جاب امتياز علي 20 طالب في دفعته .. يبقي بتاع تجاره هو اول الدفعه ..لان عدد الراسبين في دفعته اكبر من عدد الراسبين في دفعه بتاع علوم
وكانت النتيجه لتطبيق اللائحه علي توني ان اول الجامعه السنه دي شخص مجموعه اقل من مجموع الاربعه الاوائل علي قسم كهربا اتصالات , بل اقل من الاول علي قسم كيمياء
لانه من قسم مدني , القسم اللي فيه اعلي نسبه رسوب لانه ببساطه القسم اللي بيقبل اقل مجموع بين باقي الاقسام في تنسيق السنه الاعداديه
اللي عمل اللائحه و طبق القرار الكوسه ده نسي ان اول دفعه مدني السنه دي كان ال 72 علي دفعته في اعدادي هندسه في حين انتوني كان الاول علي الدفعه في الوقت ده .. ونسي ان قسم كهرباء لما قبل الطلبه كان بينهم حوالي 100 جايبين امتياز و مدني كان عنده 3 طلبه جايبين امتياز بس وان عدد طلبه كهربا حوالي 450 طالب , في حين ان عدد طلبه مدني حوالي 900
يعني طبيعه القسم نفسها مختلفه تماما , و طبقا لمنطق السيد العبقري صاحب القرار فاي قسم عايز اول الدفعه يكون من عنده .. كل اللي يعمله انه يسقط كل الطلبه اللي عنده ما عدا واحد ..بشرط ان عدد الطلبه في القسم ده يكونوا كبير بالمقارنه مع عدد طلبه الاقسام الاخري
عمار يا مصر تحت قاداتك الرشيده
وربنا علي الظالم و المفتري
----- حفله التخرج
بما اني لسه خريج جديد .. فمن حقي قانونا ان يكون ليا حفله تخرج , ومفهوم طبعا ان الحفله دي هديه الكليه للطلبه الخريجين منها , احتفالا بهم و بالمجهود الذي بذل في سبيل تعليمهم و اكسابهم المهارات المختلفه(يعني تخيلوا معايا ان في حاجه زي كده في التعليم المصري ) وطبعا عشان الحفله تكون ناجحه .لازم تكون بتخدم هدفين .. الهدف الاول هو جزء تقليدي يكون غالبا شيء مرتبط بعاده تراثيه تتوارث عبر الاجيال منذ انشاء الجامعه .. وتكون علامه مميزه لها , ولا يضير ان يكون هناك بعضا من الاساتذه يلقونكلمه قصيرمنعا للملل والهدف الثاني ان تكون الحفله تخدم ايضا الجزء الشبابي وهم المحتفل بهم في الاصل , ويتم هذا عن طريق اعداد مفاجئه مثلا واحضار احد الفنانين المشهورين , او حتي اعداد برنامج ترفيهي
-" تقديرك ايه يا باشمهندز ؟ " سألني الراجل اللي واقف علي المكتب قدامي وطلعني من افكاري وانا بحلم بشكل حفله التخرج , الحفله اللي تعتبر اخر نشاط جماعي حعمله قبل دخول الجيش .. وعشان كده ليها قدسيه خاصه في قلبي
ومع خروجي من حلمي بدأت ادخل كابوس جديد , كابوس الحفله اللي الكليه محضراها مش اللي كانت في خيالي من شويه
اولا , الحفله و اللي اعدوها معدومي الحس و المسئوليه لانهم حددوا ميعادها يوم 25 و معروف ان طلبه الجيش المرشحين عساكر حيكونوا مطلوبين من يوم 24 .. ببساطه حتكون الحفله بعد ميعاد الجيش بيوم واحد , يعني مش كفايه الحسره اللي الشباب فيها .. لا و كمان ملهومش الحق في الفرحه بالحفله
ثانيا , البالطو والطربوش ابو خيط .. اللي بنشوفهم في الافلام حيكونوا مستعملين (ترشيدا للنفقات ) و بعد ما كان ايجارهم ب 20 جنيه من سنتين .. بقي بحوالي 70 جنيه
ثالثا .. كان زمان بيتم توجيه دعوه مجانيه للوالدين عرفانا من الكليه بدور الاسره , طبعا دلوقتي فكك بقي من الكلام بتاع مواضيع الانشا دي .. اسره ايه يا عم , صلي علي النبي , 20 جنيه ثمن تذكره السيما .. اقصد الحفله المصونه
رابعا وليس اخيرا بقي بروجرام الحفله , خد عندك - السلام الجمهوري -القران الكريم و خد بالك ان السلام الجمهوري قبل كلام ربنا .. يعني وجوده هنا مجرد رمز في المكان الخطأ وليس تعبيرا عن اي ايمان او ارتباط بالله
-طابور العرض , بالعربي تزنيب الطلبه .. مع عدم القيام بصفا و انتباه الشهيره -كلمه الخريجين و دي حيقولها السنه دي واحد في رأي اخذ ما لا يستحق و رضي به بغض النظر عن اي شيء اخر , لان اي انسان نزيه سيرفض ان يأخذ ما يحق لشخص اخر طالما بامكانه ان يرفض
-قسم المهندس .. ولاحظ هنا ان اللي محجزش في الحفله مش حيقول القسم .. يعني كل الفقراء من اخواتنا المهندسين .. وكل المشغولين ولم يتمكنوا من الحضور بالاضافه الي المسافرين في الخارج لن يقولوا القسم -كلمه علان و فلان و فلان لمده 25 دقيقه .. وحبقي افكرك , لو مقعدوش علي الاقل ساعه يبقي في حاجه غلط حصلت -استراحه , مش عارف علي ايه - وشويه تكريمات و اسامي تتنده - السلام الجمهوري و الختام
فين بقي هشام عباس ؟ ولا المسرحيه ؟ ولا حتي الدي جي ؟(مع العلم ان في دي جي اتعمل في الكليه عندنا من كام شهر وحضره طلبه المعاهد و الكليات النظريه و كل من يتمتع باسم شاب ) يعني مش جديده عليهم .. ولا حتكون مسخره و لا بتاع
بس كل ده كوم .. وان انا ادفع 25 جنيه ثمن اشتراكي في الحفله و دعوتي كخريج جديد كوم تاني خالص , لييييييييييه ؟ هو الحفله ايه معناها من غيري ؟ مش انا ضيف الشرف ؟ مش انا اللي عاملين الحفله دي كهديه وداع ليا ؟ ولا البلد بقت طالعه واكله و نازله واكله .. حتي في حفلات التكريم ؟
-----
----
حاجه اخيره , اتأخرت شويه في الرد علي التعليقات بس ده لاني كنت خارج نطاق الخدمه
طبعا حيجي الناس يقولولي ايه الوقفه دي ؟ اسمها المتمم .. لان الوقفه مش بتتقال غير علي وقفه عيد الاضحي عشان وقفه عرفات , حرد و اقول عارف والله .. بس الناس اتعودت بقي ان الوقفه هي اليوم اللي قبل العيد سواء كان فطر او اضحي .. ده غير ان الكلمه نفسها بقت علامه مسجله , يعني مين مثلا مش بيقول حنزل اجيب هدوم الوقفه .. ولا حتي .. هي امتي الوقفه ؟
عموما اختي حبت تخلي الوقفه يوم مميز في حياتي , فعملتني خال يوم الوقفه و جابت نونو صغنطوط ... يالا نقول سوا بورك في الولود .. وشكرت الواهب .. ورزقت بره .. وبلغ اشده
طبعا كنت ساعتها قاعد في الاسكندريه .. سمعت الخبر روحت طاير علي القاهره علي طول .. وكله يهون عشان ابني الجديد .. مش هما بيقولو الخال والد برضه ؟
----- كونداليزا رايس بتلعب اللعبه المعهوده .. اللعبه القذره طبعا روسيا عايزه تحافظ علي سيادتها و امنها في المنطقه المحيطه , و مش عايزه الدرع الصاروخي يتبني عشان ده ممكن يستخدم ضدها بعد كده , و هي طبعا عندها حق .. وامريكا عايزه تضغط علي روسيا , لكن واضح من المباحثات الاخيره ان روسيا مصره علي رأيها النهارده وبعد اقل من يومين علي المحادثات تقوم الاخت الفاضله كونداليزا ربنا يهدها يا رب بعمل محادثات اخري مع بعض الجمعيات التي تطالب بزياده الحريات في روسيا وبحث سبل دعمها في المستقبل.. وكلاكيت تاني مره ... يا بوتين حتخرس ولا نشعللها نار في بلدك و نوجع دماغك بالديموقراطيه ووجع الدماغ ده ؟؟؟بس زي ما امريكا عندها ورق ضغط ضد روسيا .. روسيا برضه مش حتسكت , ماهي لسه عندها العراق و حادثه الخميس الماضي اللي مات فيها 15 طفل و امرأه بلا اي حساب لسه طازه و يا عالم ... ايه اللي بيحصل ورا الستاير دلوقتي كنت اتمني ان العرب يكونوا بالفصاحه دي و يتعلموا اللعب بالورق .. بس واضح ان مالهومش غير في توم و جيري -----
شعره تفصل بين العلمانيه و الالحاد , اخشي ان البعض اعتاد مؤخرا التنزه عبرها باسم التقدم -----
اعلان التلفزيون الخاص بتشجيع شباب الخريجين بالبحث عن صور بديله للعمل بدلا من انتظار العمل بمؤهل التخرج ليس الا صوره رخيصه لالقاء اللوم علي الضحيه واتهامها بالباطل بما لا يصح .. عزائي الوحيد انه لا يضر الشاه سلخها بعد ذبحها
فالقول بان الشاب الجامعي مقصر لانه يأبي ان يلقي بتعليمه جانبا و يعمل سباكا او بليه في ورشه بدلا من الجلوس علي القهوه ..عار علي الدوله بكل المقاييس , وهذا الكلام لا ينقص من شأن السباكين و اصحاب الحرف .. لانهم اناس افنوا حياتهم لتعلم هذه الصنعه الي ان اتقنوها .. ولهذا استحقوا العمل بها , اما شباب الخريجين فهم اناس صرفت عليهم الدوله الملايين ليتخصصوا في مجال اخر , وتم القاؤهم في الشارع في نهايه الامر
وبما ان الجميع مصيره الان الي القهوه او الي العمل كبليه .. فانا اقترح اختصارا للطريق و توفيرا لمال الدوله ان يحترف الطلبه في المدارس صنعه بدلا من تضييع الجهد والمال فيما لا يفيد
بقالي كام يوم كده قاعد في القاهره, لانه كان مطلوب مني اداء بعض الاختبارات في الكيلو 4.5 , طبعا ولا كان عمري سمعت بالكيلو العجيب ده قبل كده .. ده غير ان اسمه يخالف ابسط قواعد التسميه في العالم , الاسم عباره عن مسافه , ومطلوب حل الفزوره و معرفه المكان المطلوب يبعد 4.5 عن ايه و في اتجاه ايه ؟, شديت الرحال مره تانيه للقاهره في رحله كفاح جديده واكتشفت ان الكيلو ده ممكن اروحه بطريقتين .. يا اما من عند حلميه الزيتون اركب مواصله علي هناك , يا اما من رمسيس , انا قولت لنفسي .. حلميه الزيتون حتكون اقرب وحتاخد وقت اقل , ركبت المترو .. نزلت عند المحطه والحمد لله لقيت ميكروباص متهالك الي اقصي درجه و بينادي عمال يقول اربعه و نص ... اربعه و نص
نطيت فيها وكنت اخر راكب في العربيه فالراجل طلع علي طول و لقيته طاير بالعربيه , اصل الساعه كانت 7 الصبح و الطريق فاضييي .و الغريبه انه جاب بيها سرعات اعجازيه بالمقارنه بحاله العربيه المفككه الاوصال, لدرجه اني سألت نفسي , يا تري السواق حيعمل ايه لو حد طلع قدامه فجأه؟ ياتري 1- حنموت في العربيه و اللي طلع حينجو ؟ 2- اللي طلع هو اللي حيموت ؟ 3-كلنا حنموت ؟
بصيت حواليا لقيت خير اللهم اجعله خير ناس كلها لابسه كاكي في كاكي , و علي اكتافها نجوم كتيير قوي و شويه طيور و زواحف كمان
روحت مايل علي اللي جنبي و سألته .. لو سمحت متعرفش فين وحده الانتقاء والتوجيه ؟
الراجل بصلي وبعدين بص للي قدامه و سأله ... فين وحده الانتقاء و التوجيه ؟ راحل الراجل اللي قدامه ساب المصحف اللي في ايده و قاله .. معرفش اللي جنبي ماستسلمش .. راح سأله تاني مش هي دي اللي جنب المدفعيه ؟
التاني راح قايله ايوه ,و طبعا طبقا لخبرتي المتراكمه في قدره اهل القاهره الاعجازيه في الارشاد والتوجيه .. خصوصا فيما يخص الطرق و الاتجاهات اقدر اقول ان الراجل اللي قدامه قال ايوه مش عشان هو عارف .. انما قال ايوه لانه عايز يخلص من الازعاج ده وخلاص
اثناء طيران العربيه , لقيت الراجل اللي جنبي بيبص قوي علي بوابه عدت جنبنا .. وبعد حوالي 200 متر كده قالي متهيألي البوابه اللي فاتت دي هي اللي انت عايزها .. روحت قايل للسواق علي جنب لو سمحت .. ولان الصوت بطبيعته يخضع لقواعد الفيزياء .. فكلمه لو سمحت موصلتش للراجل غير بعد حوالي 500 متر من البوابه وانتبه ان في بني ادم بيتكلم ورا
راح قايل نعم من غير ما يقلل السرعه و بص وراه.. وصلتلي نعم دي وانا علي بعد 600 متر من البوابه قولتله علي جنب بصوت اعلي .. هنا ادرك الرجل اخيرا اني عايز انزل .. فشال رجله من علي البنزين و بدا يهدي العربيه
وعندما توقفت العربه اخيرا .. كنت علي بعد حوالي 700 متر من القاعده و علي بعد شعره من ان افقد صيامي , تطوع احد الركاب ونصحني اني امشي الحبه دول وامري لله كأني منتظر اقتراحه!
وصلت الوحده وابرزت بطاقتي العسكريه (هي لسه مش بطاقه مجرد استماره بس تعتبر اداه التعارف الوحيده بيني و بين الجيش ) و دخلت
الاختبار كان عباره عن 4 اجزاء اول حاجه التصوير .. طلعنا الدور الاول و دخلنا حجره متوسطه .. وبدأنا التصوير ... يدخل الفرد امام الكمبيوتر .. و يحط الباركود بتاعه قدام سكانر .. الكمبيوتر يطلع تيت وياخد الصوره ..ز ويجي اللي بعده وهكذا
لحد ما واحد طويل ربنا يعمر بيته خبط اللمبه اللي تعتبر مصدر الاضاءه الوحيد (والبديله عن الفلاش ) في الحجره .. وتوقفت الدنيا .. قعدنا نتحايل علي اللمبه علشان تولع تاني .. بس مفيش فايده , راحل العسكري طالع من الاوده و نده علي واحد رتبته اعلي , الراجل ده وقعد يضرب اللمبه عشان تعترف .. اقصد تنور لحد ما ربنا كرمها و نورت في الاخر و خلصنا التصوير علي خير
المفروض في البدروم يدخل واحد يشرح لنا الاختبار التالي حيكون عباره عن ايه , ولان الاختبار كان عن طريق الكمبيوتر .. ولان الموجودين مش كلهم بيعرفوا يتعاملوا مع الكمبيوتر لان في ناس جايه من الارياف و الصعيد و تعليمها متوسط و فوق متوسط , فكان لازم الشرح ده يتم بالتفصيل
نزلنا البدروم و لقينا المفاجئه , او في الواقع , لقينا رشوه غير مقبوله
لقيت ظابطات برتبه ملازم اول داخلين هما اللي يشرحوا , ال يعني الجيش كده حيبقي احلي في عيون المجندين الجدد .. طبعا الشرح كان في غايه السذاجه ويتلخص في اني حلاقي قدامي عدد اتنين زرار واحد مكتوب عليه نعم والتاني لا
وفوقيه سؤال , اقرا السؤال و اضغط اما نعم او لا
خلصنا المحاضره في البدروم , وطلعنا عشان نمتحن بقي فوق
واول ما دخلنا سألونا , في حد مش بيعرف يستعمل الماوس ؟
ناهيك عن ان الشاشات كانت تاتش سكرين كلها , ومش عارف ايه لازمه السؤال ده , بس عموما حمدت ربنا ان محدش قال لا , والا كنت ضيعت ربع ساعه كمان علي ما يدولو كورس في استعمال الماوس
وخلصت امتحاني علي خير اللي كان برضه بيراقب علينا فيه عنصر نسائي ,و كأنهم بيرشونا عشان نحل كويس في الامتحان و منحاولش نغلط عن قصد وننزل عساكر تاني
بعد كده بقي كان في المقابله الشخصيه .. وكانت عباره عن ضابط ليه رتبه عاليه قاعد جنب عنصر نسائي و قدامهم جهاز كمبيوتر , وانا قاعد ورا الجهاز بجاوب علي اسئله العنصر النسائي .. والرتبه قاعد يتفرج
عليا انا طبعا
بعد كده اخر حاجه بقي كانت عينه الدم , حوالي عشره سم من دمي اخدوهم ببلاش .. مع ان لتر الدم دلوقتي يعمل علي الاقل خمسين جنيه لو مدعم , حسبي الله ونعم الوكيل
انا مش خبير في النوع ده من الفنون .. بس مؤخرا بقيت محطوط في بؤرته نظرا لاني المحظوظ الوحيد في دفعتي اللي اتاخدت كظابط احتياط في الجيش ... و الباقي دخل عساكر لمده 9 شهور فقط لا غير ... وعشان تتخيلوا الوضع معايا .. انا المفروض حدخل كليه ظباط الاحتياط لمده 8 شهور .. يعني حتخرج و ابدأ اقول يا هادي في الجيش لما يبقي اصحابي فاضلهم شهر و يخلصوا الخدمه العسكريه
ونظرا لأني الوحيد اللي داخل كظابط في دفعتي فعمليه المواساه من اصحابي و جيراني اصحبت مركزه في شخصي الضعيف , والغريبه ان بعض الناس لا تجيد هذا الفن علي الاطلاق .. وزي ما بيقولوا جه يكحلها عماها
بس عموما الكلام مخرجش عن تلات مواضيع
1- وماله يابني .. الظابط هيبه .. و لما حتدخل حيعجبك الوضع و مش بعيد تكمل في الجيش بعد كده و ظابط احسن من عسكري .. ده حتي بياكلوا احسن اكل
وده اسوأ نوع من انواع المواساه .. لاني بكره الجيش اجمالا .. كفكره و كأسلوب حياه , فضلا عن مرتبات الجيش اللي جديره بتحويلي متسول في غضون عده سنوات , ده غير ان الجيش حاجه كده زي البطيخه .. يا تشتغل في حته ممتازه و تستفيد وتفيد .. يا تترمي في الصحرا تقزقز لب مع العقارب و التعابين , و بخبرتي المتواضعه في الكام شهر اللي فاتوا اعتقد ان عندي نوع من انواع النحس المقيم بجانبي طول الوقت .. عشان كده ما فيش امل غير في اني اقزقز لب
بالاضافه الي اني مش الكائن المفجوع اللي مستني الجيش عشان ياكل , وشخصيا لا امانع اطلاقا في اني اصوم 9 شهور .. بس اخلص بدري بدري احسن ما اقعد 3 سنين اكل في كباب وكفته و اضيع وقتي فيما لا يفيد
2-دي فرصه يابني .. الجيش حيخليك حاجه تانيه .. و حيبني شخصيتك
مش عارف ايه وجهه نظرهم في موضوع الشخصيه ده , بس انا مش شايف ابدا اني معدوم الشخصيه و يائس للدرجه دي !!
3- محدش عارف الخير فين
ودي بصراحه احسن حاجه ممكن الواحد يسمعها في الظروف دي , اعترف اني حاليا بمر بحال نفسيه سيئه .. خصوصا لما اجي اقارن حياتي المدنيه من غير جيش .. والمنحه اللي ضاعت في كفه .. والجيش و تضيع الوقت اللي فيه من كفه تانيه , لكن الكلمه دي بيكون فيها معني مهم جدا بالنسبالي
الامل , وانتظار الافضل
و مين عارف .. مش يمكن يعترفوا بقدراتي و ابقي لواء أ.ح و ياخدوني وزير .. او حتي يحصل انقلاب في الجيش .. و نلغي الملكيه و ابقي من الظباط الاحرار ؟
محدش عارف الخير فين
-------------------
تقسيم العراق
اخيرا ظهر الكونجرس بوجهه القبيح و اعلنها بشكل فج .. قرار غير ملزم بتقسيم العراق
هو صحيح غير ملزم .. بس طول ما القوات الامريكيه هناك .. حتعمل جاهده علي جعله القرار الوحيد الممكن في ظل العمليات الطائفيه
و خصوصا بعد تسليح بعض الفئات السنيه و الشيعيه علي يد الجيش الاميريكي بدعوي انهم يشاركون في حفظ الامن , الغريب في الامر ان الشرطه خارجه عن نطاق السيطره و مخترقه من قبل الميليشيات , باي منطق يدعموا بعض الميليشيات لتقاتل البعض الاخر و ما هي الضمانات الا تستخدم هذه الاسلحه في اذكاء نار الفتنه الطائفيه ؟
طبعا هذا السؤال موجه للمشككين في ان امريكا هي اصل الفتنه الطائفيه وليس موجه للاداره الامريكيه , فامريكا ستستفيد بشكل مباشر بمجرد تقسيم العراق .. لانها تكون قد قضت علي تهديد حقيقي دام سنوات و سنوات بشكل نهائي
----------
ننتظر في الاسابيع المقبله مجزره جديده واسعه النطاق في غزه , ومع زياده الدعم العربي لاسرائيل من قبل الحكومات .. والتي افترضت ان شعب غزه هو العدو الواجب القضاء عليه , اصبح امام اسرائيل ان تجمع افضل جزاريها استعدادا لعيد الاضحي المبارك
----------
تحيه لرجال المحله الكبري في وقفتهم , و تحيه اكبر للحكومه المصريه في استمرار دعمها لتطوير الاقتصاد المصري و تعليم الشعب فضيله الجوع
مش بالظبط تأتي و تذهب .. لانها احيانا تأتي بما لا تشتهي السفن .. وبغض النظر عن حقيقه ان السفن حاليا مش بتشتهي حاجه خالص غير الستر ..واضح ان الرياح مستخسره حتي الستر علي السفن
وعلي رأي المثل الكحكه في ايد اليتيم عجبه!!!
وبمناسبه موسم الامثال والحكم دي احب اعلن خبر هام جدا
وعلي رأي المثل يا خبر بفلوس بكره يبقي بضريبه مبيعات
قبل ما انسي بقي عايز اقول ايه .. وسط هذا الخضم الهائل من الامثال , انا بكل اسف احب اقولكم ... انا بقيت ظابط احتياط في الجيش المصري , عشان اقوم بتأديه الخدمه الوطنيه الالزاميه لمده 3 سنين .. ادعولي بقي بالصبر علي ما ابتلاني به الله .. واعدي المحنه دي علي خير
اول يوم رمضان . كان اسوأ يوم اشوفه في حياتي , كأن الناس بتخزن كل المشاعر السلبيه في اليوم ده و تطلقها مره واحده , مش بس بتكلم علي المواصلات و الهبل اللي بيحصل فيها ... حتي المعاملات اليوميه بتبقي مشحونه بشكل فظيع , انا في اليوم ده شوفت عربيتين بيتكسروا قدامي .. و شباب بيحدف بعضه بالزجاج في معركه تصفي لمرتبه عين جالوت مع اختلاف العدو و سبب المعركه طبعا ... وكالعاده البوليس جه بعد خراب مالطه ---------- بعد غياب الاحزاب السياسيه من الساحه المصريه ما عدا حزبين احدهما طابق علينا و التاني محظور نتعامل معاه ... اختار الشعب المصري حزبين جداد خالص ... حزب الزمالك .. وحزب الاهلي , قولي بقي .. انت اهلاوي ولا زملكاوي ؟ --------- اول ما حطيت رجلي في القاهره .. شميت ريحه سبرتو(كحول) لدرجه اني بصيت بقرف لواحد كان معد جنبي . قولت لنفسي للدرجه دي الشعب بقي منحل و بيشرب سبرتو
تاني يوم نزلت الشارع لقيت نفس ريحه الكحول ماليه الشارع ... بصيت بقرف لمجموعه المحلات اللي معدي عليها .. وقولت لنفسي ... خلاص , بقت الحاجات دي بتتخزن عيني عينك في محلات البقاله و الخضار ؟
تالت يوم عديت جنب بنزينه .. حسيت اني لو قعدت عشر دقايق حعمل دماغ فظيعه من كتر تركيز الكحول في الجو .. سالت صاحب البنزينه , هي ايه الحكايه .. قالي اصلنا استوردنا بنزين من ليبيا .. و داخل في تكوينه الكحول والعربيات كلها ماشيه تطلع في الكحول ..لما احنا بنستورد بنزين بالكحول.. ليه بنصدر بترول ؟؟؟؟؟؟
---------- في ناس زعلانه عشنا اللي حصل مع رؤساء التحرير .. انا مش عارف زعلانين علي ايه ؟
يا جماعه احنا بنعيش عصر جديد من حريه الصحافه , عصر يفوق في نزاهته عصر جمال و السادات , جمال امم قناه السويس .. السادات عبر وحرر سينا(بس مبارك رفع العلم ) .. مبارك جه بالثوره الاقتصاديه و حريه الصحافه وبني مصر اللي دمرتها الحروب
من حق كل صحفي التعبير عن رأيه بكل صراحه ووضوح وشفافيه
ومن حق الحكومه التنكيل بيه في اي وقت ولأي سبب مهما كان
