شكرا فودافون

إللى حصل فى الكام يوم إللى إتعرض فيهم إعلان فودافون.

رجعلى الأمل فى حاجات كتير قوى .

رجعلى الأمل فى إننا شعب إيجابى .. كل مشكلته إنه إعتاد الخوف 

شعب ليه رأى ..

وقادر على التعبير عن رأيه بإحترام و تحضر ..

شعب عظيم ..

رجعلى الأمل فى التغيير 

مش بس فى معناه السياسى لكن فى معناه الشامل .

لو حطينا إيدينا على مناطق الضعف .. 

وقدرنا ننظم توجهاتنا ..

حتتحول مجهوداتنا للبناء مش مجرد المشاهدة و مصمصة الشفايف

كلنا شفنا الكليب بتاع إعلان فودافون إللى مس عباس بن فرناس بشكل غير لائق , وأنا شخصيا حسيت بالإمتعاض من كل حاجة فيه , من أول لحظة .. لأخر لحظة , و دخلت على الفيديو و حطيت تعليق , كان فى طبعا كالعادة ناس بتشتم , وناس تانية بتصفق بحرارة لإبداع فودافون فى الإعلان .. وحرية الفكر .. وكلام كتير ممكن نردده فى غير مكانه , لكن الغالبية كانت بتعبر بشكل كويس ومتحضر.

و أكتر واحد لفت إنتباهى .. دردوش .. أيون .. دردوش .. عشان هو مش قال لأ و بس .. لكن قال نعمين

زى ما طالب بحقه بتحضر و بشكل لائق تماما , شكر القائمين على الشركة وقدم نصيحة لكل من يريد أن يعبر عن رأيه بألا يتجاوز الخطوط الحمراء و يهين الناس.

تحية لدردوش من القلب

و أشكر فودافون إيجبت على إستجابتها لرأى الجمهور .. حتى لو كان هذا لحماية مصالحها فى المقام الأول و الحفاظ على عملاءها وسط المنافسة الشرسة فى هذا القطاع .